秒投账户 -- 古天后

5月4日，天阴阴，灰沉沉，间中有骤雨，但唔多觉今日有阳光。隔晚美股又嚟来回地狱又折返人间，早段道指曾急跌近400点，逼近23500点重要防线水平，不过低位又见买盘涌现，至中段时份已扭转跌势，收市道指竟能倒升5点；标指跟纳指跌幅亦大大收窄。花旗隔晚经济数据未见有特别，但3月份贸易赤字再收窄，对一向洗脚唔抹脚嘅美国嚟讲，贸易减少系好事。

美国隔晚走势咁飘忽，皆因初段市场担心中国就贸易磨擦谈判，摆出一副誓不低头嘅强硬姿态，中美双方今次未必有计倾，美方代表团或徒劳无功。不过至中段白宫传嚟消息，指贸易谈判进展良好，加上美股跌至昨日低位，又再重新吸引资金捞底。美股是生是死，留意住道指23500点呢位，几次都系呢个水平即见资金入场，一旦道指失守此关，古天后都冇眼睇。

至于港股继续半生不死状况，踏入五穷月港股连跌两个交易日，恒指裂口低开后低走，最多跌605点，一度低见30118点，收市前跌幅略为收窄，但仍跌410点，报收30313点，再度失守全部移动平均线。至隔晚美股早段急挫，亦拖累港股夜期低见29700水平，低水扩大至超过500点，ADR亦曾跌穿30000大关。最终夜期报收29938点，低水近400点，但ADR竟然收复大部份失地，仅跌6点收档。

从牌面睇，港股走势确系转弱，但严格嚟讲，好淡仍未正式分胜负，由于市况太飘忽，缸边友入场意欲大减，令港股出现成交低，但指数波幅大嘅现象。恒指一直处于区间内移动，但不得不承认反弹浪顶一浪低于一浪，短线恒指喺29800至31000点之间上落。咪睇少呢千二点幅度，单日高低位即使最多只有五六百点，但期间又上又落，已足够玩谢期指炒家，而牛熊证则大小通吃。所以古天后一直表示，除非阁下属于炒市高手，又或全职专业炒家，否则呢期只宜炒股唔炒市，尤其系牛熊证玩家，过夜风险大增，日日同你玩裂口，贴价牛熊好易被回收。

今日市场焦点应该系由平保(02318) 股价及相关新闻 分拆上市嘅平安好医生(01833) 股价及相关新闻 ，上市前噚日喺龟孖屐嘅暗盘价虽然曾高见68元，但最终收报61.65元，仅较招股价升12.5%，抽手一手计，每手帐面赚685元，赚咗一餐便饭价钱。不过以大额孖展落头槌飞嘅玩家呢铺睇怕要损手，皆因头槌飞仅分得154手，即15400股，好医生至少要升9元或16.5%，即股价升至63.81元方可平手离场。暂时粗略计算，头槌飞客要蚀三万三利息。

若然今日市况生生性性唔再插水，好医生最多可升两成左右，呢个系较乐观预测，但古天后认为好医生升幅未必有15%，加上孖展认购者通常首日上市即沽货离场，好医生埋单升倒一成已经算有交代。古天后冇抽中好医生，亦唔打算挂牌后追货，一于买定花生睇吓好医生点行点走。至于阿妈平保，呢几日走势都系弱过药煲，上周股价跌穿80元大关，已呼吁大家咪手多接飞刀，即管睇睇75元呢个位守唔守得住，尤其面对空军来势空空，累积沽空金额逾千亿元，较腾讯(00700) 股价及相关新闻 累计沽空金额仍要多，可见大户对平保睇法有几淡。