秒投账户 -- 古天后　　

4月3日，天晴，温度上升，初夏已到，天气炎热。放完几日复活节假期，理应收拾心情，专心工作，奈何返两日工，星期四又到清明节假期，确系好难唔心散，唔少人索性请三日大假放足10日假期外游。其实又何止假期令人心散，望见美股表现真情令人心碎，隔晚美股又插水，复活节假后股市未见复活，道指盘中更大跌759点，虽然尾市跌幅收窄，但三大指数收市仍要跌逾2%。中国开始对美国过百种进口商品征收关税，市场担心中美贸易战升温，加上「侵侵追住电商亚马逊唔放，令呢只龙头科技巨企股价未能止跌，而其他科技股亦因种种负面因素插水。
　　
美股插水拖累港股ADR表现疲弱，按批例计算，ADR跌逾200点，报收29856点，再失二万大关。而恒指喺新加坡黑期更曾低见29477点，暂时恒指黑期则喺29800点附近上落，预期今日港股三万大关将失守。以为经过二月及三月调整，港股第二季及四月可迎来较佳表现，但美股四月份开局即插水，港股第二季睇嚟都系继续chok过林峯。
　　
虽然古天后相信中美贸易战最终可以喺谈判桌解决问题，但「侵侵」钟意失惊无神玩突袭，唔怪得之缸边友话家阵要开住侵侵个社交网页嚟炒股，皆因佢喺网上发表相关国策言论，系各地股市上落嘅关键。而侵侵难以捉摸嘅性格，令其喺国策及国际问题上出招时飘忽不定，环球股市由去年嘅特色升市变成今年特别chok 市，上任一年嘅蜜月期过后，今年股市搵食变得艰难。资金避险情绪升温，流入股市资金将减少，反而资金流入美国债市，令债息有所回落。
　　
至于港股第二季何去何从，睇番几只重磅领头羊，如腾讯(00700) 、平保(02318) 、港交所(00388) 等等喺第一季创新高后，虽未至于打回原形，但技术走势已走晒样，短期只有波幅，难有升幅，面对咁嘅情况，除咗轻仓上路之外，就只有打游击战。即系急跌时捞货，见反弹要识食糊，扑晕自己死坐呢招已失效。回顾第一季，数嚟数去最强劲都系医药股，此外教育股跟内需股亦有资金追捧，而贸易战令内需股更为吃香，每当呢几个板块跟随大市插水，要捞货博反弹，都系吼住呢几个板块胜算较高。