秒投账户 -- 古天后　　

3月16日，晨早又见一片浓雾，天气和暖，中午开始有阳光，个人又会醒神些少。美股隔晚个别发展，道指插水三日后，卒之识得弹，不过标指则连跌四个交易日，纳指微跌。华尔街继续畀有关贸易战消息左右，有传闻指就算侵侵喺未来几个星期宣布有关宣布中国贸易嘅调查，或任何措施，亦尽量以唔触发贸易战嘅方式进行。古天后都系嗰句，侵侵所谓嘅贸易战，只不过用把口靠吓，希望为花旗争取最大利益，但要明刀明枪打起上嚟，定必几败俱伤，山姆叔叔又点会搵自己笨。

不过对于投资市场嚟讲，唔明朗就系唔明朗，一日阴霾未除，资金总要搵方法避险，唔会过份进取，令股市近日陷入升嘅时候唔够爽，插嘅时候又唔狠嘅两难局面，幸而古天后近日以炒股唔炒市嘅策略应对，完全可以轻松面对呢个困局。港股呢边虽然似强非强，恒指虽然己收复多条移动平均线，但迟迟未能向上冲破31800点阻力，令唔少缸边友继续口淡淡。其实睇得仔细些少，恒指呢几日唔单止大展其拗腰功力，重磅股几大股王，除咗大笨象(00005) 股价及相关新闻 业绩公布后持软疲弱之外，腾讯(00700) 股价及相关新闻 、港交所(00388) 股价及相关新闻 跑赢大市，平保(02318) 股价及相关新闻 闷咗几日，噚日亦急起直追，走势终见突破。

先讲腾讯，昨日再升逾1%，报收468.6元，跟1月份历史高位只有数步之距，而恒指跟一月高位仍有二千点路程，跑赢大市成条街，呢个势头仲话唔够劲，真系无说话好讲。集团下周三派成绩表，大行未见成绩单先兴奋，已急不及待调高其目标价，当中最牛预测目标价系684元，即系距现价仍有五成升幅。腾讯可以升到边个位，古天后无水晶球，不作任何预测，不过一向对呢只企鹅爱不释手，任何情况都系以六字真言对待，「有买贵，冇买错，咪再问腾讯睇几多。随住业绩其逼近，腾讯有本指带领别号腾指嘅恒指向上闯关，重上三万二大关。

至于平保自去年开始亦成为古天后爱股，内险股不作他选，皆因平保已开始转型，唔再系传统保险股，渗入fintech成份，令其前途更为光明。集团今年已计划分拆陆金所及平安好医生，价值将进一步释放，成为红底股指日可待。其实投资腾讯跟平保呢类优质重磅股，只要其基本因素不变，手持股份不应对短线股价走势太过介怀。尤其有啲缸边友，日日问住股价走势如何如何，支持位，阻力位，目标价同止蚀价，更甚者一日问几次，尤如早午晚要食三餐，估计系想短线走位炒牛熊，古天后得罪讲句，呢种人唔会赢到大钱。想享受优质股巨大成果，必要有耐性坐货，当然本金较多又识走位，预留一部份短线操作无问题，但本金有限又唔贴市，未必能做到出入平安，更多时候系沽货之后又要高位再追货。投资优质股，搵啱位上车后耐心坐货定必有回报，人家股神巴菲特手持可口可乐几十年，就系相信可口可乐属优质而伟大嘅企业。祝大家出入平安，happy Friday!