秒投賬戶 -- 古天后

2月5日，噚日已立春，但一啲春天嘅气息都感觉唔到，早上气温又得番单位数，除咗寒冷天气警告，连霜降警告都出埋，大家要继续注意保暖。天气冻，好友心更寒，上周五欧美股市显著下挫，经历咗黑色星期期，美股三大指数跌逾2%，道指更跌2.5%，足足跌咗666点，一个魔鬼数字，睇见都心慌。至于港股当然亦被拖累，夜期跌413点，报收32095点，咪以为守住三万二关，ADR此关已失，黑期时段进一步下挫，暂时只系险守31800点。

古天后早于上周港股结算前，创新高见33484点之后，已表示应适量减磅，虽然穿顶唔估顶系古天后一向宗旨，但创新高当日已急回，穿头破脚走势，已预示调整随时展开。而其后大市一直冇法重上三万三水平，古天后更每日提醒大家勿再急于入市，好仓衍生工具更应全数撤退，并减低甚至停止杠杆操作。

早几日古天后已将今次大市调整幅度及调整至大概边估水平清楚写咗一次，今日再不厌其烦重复，供大家参考。由去年12月份大市由低位28134点，持续上升并创下33484点历史高位，累积升幅达5350点，以黄金比例回吐0.382计算，即由高位计算调整2043点，即31441点，或者会系今次调整浪嘅第一个支持。一旦失守，下一回吐为黄金比例0.5，即由高位回吐2675点，即30809点；而大市若仍处于升浪中，最尽回吐幅度为0.618，即3306点，即恒指最差可见30178点。

不过古天后倾向相信回吐幅度0.5，已可满足一个大牛市需要嘅调整幅度，而港股50日线现约处于30527，港股自去年初只跌穿过呢个水平4次咁大把。最耐一次正正系旧年12月，跌穿4个交易日后，恒指已回复一浪高于一浪嘅升势。况且狂牛深度调整系意料中事，高位回吐5至8%好基本，呢个幅度嘅震荡亦承受唔起，仲边有资格参与大市90度直角上38000点至40000点呢一个狂牛派对。

过去一个周末，古天后收到唔少讯息，都系问关于几只重磅股，买入价距现价仍有利润，担心一旦回调，利润或蒸发，甚至要捱价，应否先沽出套利，候低再吸纳。古天后只能咁讲，上星期33000水平已叫咪再高追，持重仓甚至要减磅，今日一旦跌穿32000点先嚟沽货，明显优势已失。若然阁下所持系指数重磅股，而系平货当然可以放心坐，但预咗账面身家喺未来一两星期或会少咁一截；至于高追嘅，数量唔多，亦无必要为咗可能再出现嘅1000-2000点跌幅而出出入入。至于利用衍生工具，即牛证或Call轮当正股坐嘅朋友，只能讲句爱莫能助，古天后唔敢担保北水会否出手相救，尤其牛证要面对回收风险，随时渣都冇。

上周五古天后已再重申，恒指牛证街货重货区喺31800-32200，大户食完头盘又点会唔食埋主菜，呢块肥美和牛扒，唔锯都对自己唔住。至于腾讯(00700) 股价及相关新闻 牛证街货重货区，系420元至425元，周五ADR腾讯已低见436元水平，近在咫尺，呢个重货区几乎全军覆没。港交所(00388) 股价及相关新闻 牛证重货区265元至280元，呢堆牛证被劏机会亦大；至于平保(02318) 股价及相关新闻 牛证重货区70元89元，若然平保要落去回补上升裂口，80元或以上嘅牛证亦属高危，持有上述三宝嘅牛证朋友，只能自求多福。最后讲多次，衍生工具系用嚟炒，唔系用嚟坐嘅，狂牛坐正股当然有权笑到最后，但死坐牛证以为坐定笠六，更多时候系未曾享受已被回收。