秒投账户 -- 古天后

1月30日，寒冷天气警告生效，仲要天阴有雨，最低气温降至单位数，又湿又冻，呢啲天气最好大觉瞓。至于港股跟气温一样急降，港股噚日裂口高开后又创新高，恒指最高见33484点，但高位缺乏承接，加上有投资者欲高位锁定利润，惹嚟获利沽压，令大市反复回落至32897点盘中低位，收市报32966点，跌187点，又再出现穿头破脚。港股噚日跌势，似乎预示美股周一出现回吐，美股三大指数隔晚回吐，但相对上周五升幅，美股回吐压力有限。而港股喺夜期及ADR时段，亦回落至32900水平之下，暂时喺32800水平争持。

自踏入1月份港股展开狂牛之旅，古天后已提醒大家，无论单日波幅或单周波幅将会扩大，睇番噚日高低位波幅已超过500点，所以千叮万嘱喺目前唔应该再以高杠杆操作，而衍生工具亦已短炒为主，最好日日清，咪再好似之前咁，以为长坐牛证或call轮一定袋袋平安。今日期指结算，而明日月结及黑期结算，港股将更为波动。

至于噚日咁嘅走势，系咪代表港股33500点要行人止步，呢层古天后唔敢讲，事关类似嘅走势，曾经喺恒指升抵31700水平时出现过。1月15日港股同样裂口高开，其后回落完全回补上升裂口，较高位跌逾300点收市，但翌日大市回升，并升抵31900水平，其后故事发展唔使讲，所以暂时未可以肯定大市见顶。况且今个月由30000水平起步，至昨日高位升逾一成，有回吐亦属正常，即使回落一千点至32500水平，亦只不过系测试10日线(32532) 股价及相关新闻 ，只要能稳守10日线，较大幅度嘅调整唔出现不特止，仍有机会再继续其寻顶之旅。

暂时短线支持位喺32800点，而下一个重要支持为32500点，如果阁下有平货在手，唔穿呢两个位，咪咁轻易将平货沽出，至于高追短炒嘅，当然要守得紧些少，呢两日大市唔重上三万三要小心，个别高追股份，更要严守止蚀位。

唔少粉丝见内银股近日急升，都问持股多年嘅陈年旧货，已见家乡并有微利，应否先沽货袋住先。虽然噚日内银股走势系差咗少少，全部创新高后回落，个别股份更失守开市价，日线图开出阳烛，但北水跟基金继续抢货，内银股急升过后有回吐系正常，如果只有一注货底，小心沽货过后又要追过。