秒投账户 -- 古天后

1月23日，天晴得嚟能见度低，望出去好似有层雾，湿度比较高。至于港股一如所料，噚日完全无视美国联邦政府停摆，又再创历史新高。恒指已连续第四个交易日创新高，听落好似好夸张，不过只要大家睇番美股嗰边，喺旧年一年之内，超过70个交易日都创新高，港股呢期就算咁升番又算系乜。

噚日港股都算蛊惑，高开之后即插水，更曾倒跌208点，但上半场未完已成功扭转跌势，又系下半场愈战愈勇，稍为唔够定力，以为上半场唔够力水再上，忍唔住沽货，下半场追货都追到气咳。恒指收市报32393点，升138点，而国指则升25点，报收13204点。睇番国指走势始终落后一大截，莫讲话2007年历史高位20609点未有耐可以重游旧地，距离2015年高位14962仍有一大段路。不过上证昨日收市刚刚上番3501点，A股正一步一步慢牛上升，阿爷唔容许疯牛再现，国指唯有跟住A股拉牛上树。

继碧桂园(02007) 股价及相关新闻 批股发债后，腾讯(00700) 股价及相关新闻 亦完成百亿美元发债计划，唔同嘅系腾讯无批股，发债后财力更雄厚，集资未有令股价受压，股价反而创新高460元，并以全日最高位收市。平保(02318) 股价及相关新闻 亦创新高96.15元，同样以全日高位收市，升幅更达3%。港交所(00388) 股价及相关新闻 升逾2%，报收301元，盘中曾见302.8元，破2015年大时代高位。

濠赌股表现理想，继续级级上，讲到明濠赌股今年一定胜旧年，除咗逢回吐吸纳之外，坐定定持货就系最佳策略。另一个表现突出板块系医药股，呢个板块同样系古天后今年睇好板块，跟濠赌股投资策略一样，至少上半年呢个板块都会一浪高于一浪向上推进。好似古天后曾推介嘅石四药集团(02005) 股价及相关新闻 ，12月创完新高，喺5元水平整固足足一个月后，噚日又爆升一成再创新高，连续两日爆升，摆明又系基金追货。

港股由月初至今急升，唔少股份唔单止升破2015年高位，更甚系创埋历史新高，每日都有粉丝问手上持货升至历史高位，有冇需要先沽货套利。古天后都讲咗十万九千次，破顶唔估顶，既然持货已升至历史高位，喺走势未见逆转情况下，根本唔需要急于沽货。就以腾讯为例，唔少缸边友都系坐唔定，200元沽，300元沽，400元沽，结果每当腾讯破顶又心痒痒追货，当然肯坐唔怕震仓就无有怕，至大件事系大杠杆兼高追，受唔住短期震荡，高追低沽，往往因此由赢变输，蠢过只猪。