秒投账户 -- 古天后

1月19日，天阴有雨，落雨又会凉番啲，不过好彩周末由阴转晴，今日又系星期五，一于用好心情迎接周末。港股呢个星期已创历史新高，相信无论天气如何，缸边一样心情靓绝。隔晚美股虽然回吐，但道指周三劲升逾三百点，唔系回番一百几十点都要诈形咩。至于港股喺ADR变动唔大，但夜期则随美股回调，收市失32000关，报收31993点。

狂牛其中一特点就系波幅大，呢几日缸边友应感受到港股要几chok，有几chok，自今个星期开始，均出现裂口高开后，即日回补裂口，其后又重返高位或中间位。由于噚日无论现货或期指，收市价均于于开市价，前者出现一枝小阴烛烛身十字星，而后者同样以阴烛收市，但底部出咗只脚，两者均不大利好今日走势。港股破咗顶，当然唔估顶，但要有心理准备日日都有机会坐过车，亦有机会急回，策略上确不宜过份进取，尤其衍生工具更应且战且走，切忌贪胜不知输。短炒睇住周三即使低位31642点，即系见到31650脚软企唔稳，就要提高警觉，甚至有减仓准备。

不过古天后认为今年高位仍然仲有好远路程，尤其系A股刚刚上力，噚日内地公布去年全年GDP达6.9%，唔单止好过官方预期6.8%之外，仲系七年以嚟首次提速，上证指数即高收3474点。一旦上证突破3500点巨大阻力，上证大有条件再挑战3600点，至于2015年高位5000点当然冇咁容易重游旧地，估计或要待第二季接近入摩前，外资大举入场先有机会进一步挑战该水平。

其实国指噚日劲升1.7%，升破13000点大关系一个启示，相信要重返2015年15000点指日可待。由于内银股现水平估值仍合理，只要中资金融股继续上力，国指更上一层楼问题唔大。除咗中资金融股表现强劲，沉静多时嘅中资电讯股亦见资金追落后，唔知几时变咗大市蓝灯笼嘅中移动(00941) 股价及相关新闻 ，噚日劲升近3%，以全日高位81.45元收市，终于升破80元重大阻力，下一阻力为84元，只系由80元至84元系超级蟹货区，中移动能否重拾红底股身份，先要攻陷呢个阻力区。

四大重磅股王，目前最落后系大笨象(00005) 股价及相关新闻 ，值得留意系大笨象每晚喺ADR时段均见买盘扫货，而港股日间开市其间，大笨象硬系窒住窒住。美国进入加息周期，肯定有利银行股，而大笨象无论PE或PB都跟同级数嘅国际级金融股，仍有巨额折让，要追回同业估值，大笨象应要变身小飞象。反正依家港股都系重磅股轮流炒，鲜有几只巨无霸齐齐发力，大笨象重上红底股亦系迟早嘅事。问题系阁下选择刺激，大笨象行路慢半拍，肯定唔系阁下嗰杯茶。