秒投账户 -- 割柑人

港股一口气连升14日后，终于要唞气，回吐73点，收31338。喺打大佬31958历史高位前，估计属大涨小回，只要唔跌穿30200，仍可睇好。呢趟升市，淡友监生挟死，股坛圣经话：「沽空的沽空，一切都是沽空。」应晒！不过，空军离场，若有较大调整，少咗佢哋嘅平仓买盘垫底，风险反增。

美国10年期债息逼近2.6厘，美债「熊出没注意」！美股三大指数就连日破顶，反映资金弃债投股。资金除咗流去美股，亦有流去其他股市。美汇指数（DXY）跌穿91关，亚洲货币指数（ADXY）则升穿110关，反映资金流出美国，流入新兴市场。美元走弱，亦令商品价格走强。

现时除咗美元、美债，似乎乜嘢资产都升！呢个现象唔多健康，一旦美元反弹，升过龙嘅资产就会跌到散。事实上，以RSI衡量，美股、港股已极超买，当然唔一定冧市，超买可以再超买。睇港股历来超买后走势，后市一系2008年咁Melt Up，一系1994年、1997年、2015年咁见熊！

旧年蓝筹中有5只倍升股，包括腾讯（700）、平保（2318），呢两只我今年继续睇好。点解？唔系睇水晶球，系睇方便面！中国方便面销量2013年达到高峰，卖出462亿包，但之后连续3年下滑，2016年只卖出385亿包，比高峰期卖少近80亿包，跌幅近17%。2017年就未有统计数字。

点解会咁？关经济发展事！一来人民收入增加，想要食得健康；二来智能手机普及，网上订餐盛行。2011年至2016年，中国网上订餐嘅市场规模，由216.8亿元人民币增至1,662.4亿元人民币，增幅近8倍。难怪内地方便面一哥、占33.7%市场嘅康师傅（322），喺2016年9月被剔出蓝筹。

现时中国网民达7.3亿，喺互联网新经济下，科网龙头腾讯除咗本身处于高速增长期，亦可透过分拆释放价值，据讲就快分拆微医（WeDoctor）上市。平保亦拥有11家互联网科技公司，涵盖医、食、住、行、玩，分拆陆金所、平安好医生已有声气。腾讯、平保大把金蛋，可逢低收集。