【达人专栏】古天后

　　9月26日，天晴天晴，气温又高番，吹涨，就到中秋仲系咁热，暂时都系唔觉有乜秋意。天气依然热辣辣，但大市开始凉浸浸，噚日失惊无神大插三旧几，恒指插水380点，报收27500，刚好穿咗50日线(27506) 股价及相关新闻 ；国恒同样失50日线(11006) 股价及相关新闻 ，跌196点，报收10912点，呢铺瓜多过菜。

　　噚日古天后讲咗内房股同手机设备股或出现较大幅度调整，话口未完，噚日呢两个板块齐齐过堂，跌到一仆一碌。尤其呢两个板块累积升幅巨大，之前扫得急，回起上嚟亦跌得甘，噚日大部份内房股闲闲地跌5%，更甚者跌超过一成亦比比皆是，跌势之急系整个升浪里头未见过，短期呢个板块都难搞，需要一段时间整固。至于手机设备股，受iPhone8销情欠佳影响，借势调整，连龙头股都要跌超过5%，睇嚟最快等到iPhoneX，同埋11月份季绩公布，呢个板块先有运行。

　　重磅股方面，同样九死一生，即使大笨象(00005) 股价及相关新闻 持续回购，亦未能力保不失，其他重磅股更加唔使讲，九成蓝筹股下跌，只有公用股稍为企得住，大市深度调整事在必行。

　　仲有两日到期指结算，几乎肯定呢个月唔能够九连升，今年升势终断缆，皆因今个月初开局指数喺28000水平，暂时睇唔到个市有乜本事两日之内收复失地。不过大市升抵28200水平未能再突破，再失28000水平，古天后已经提醒大家且战且走，尤其系累积巨大升幅股份，一旦日线出现高位回落变阴烛，就要止赚保盈利，亦唔建议高追急升板块，有听忠告的话，应该避过呢一转跌市。

　　不过话分两头，噚日唔少股份跌势颇急，或者有缸边友未及时作出反应止赚，今日再低开或有反弹，若然反弹受制于50日线，即约27500水平，未能收复的话，应趁反弹再减磅。相反能够重上50日线企稳，呢一次调整或又完成，但短线甚难扭转弱势，除非恒指能重上27900水平，暂时从牌面睇，可能性较低，反而更深度调整机会大。即系大市反弹而受制27500的话，下面要作深度调整的话，27200所谓支持位，其实支持有限，最大支持位系100日线(26575) 股价及相关新闻 ，即较昨日收市价仍有千点跌幅，较乐观睇法系27000点能守。

　　至于系咪要全部清仓零持则两睇，计过数有足够持货能力，而又作长线投资的话，可沽出半数股份止赚，预留资金喺深度调整时捞货。但喺现水平未系最佳捞货时机，因为古天后一直认为，喺大市进入牛三疯升之前，必见一次深度调整，而今次失守50日线，或者正正系深度调整出现嘅时机。